قصيدة للشاعر الزميل محمد النجدي
1- الضحية
يا ابو فروة مأمأ
ف الصحافة ليل نهار
رأيك بطعم الإنكسار
و المطابع مستحية
كل واحد ف البلد
أصبح ضحية
و يقول في سرة
بكرة ييجي الدور عليا
كلنا عايشين ضحايا
كلنا سكتنا
على بيع القضية
نشلنجي غنى للصهاينة
ع الكمنجة ... سمسمية
سحباه ولية ...
ضمن شلة نفعجية
ف الوسية
ف الوسية ...ت
تلقى دبح الأغلبية
أربعة من كل خمسة
و بطريقة عشوائية
كل واحد فينا
أصبح بإختصار
زي قشر اللب
ف القيمة هفية
أي حي بيندبح
ف العمر مرة
و ف بلدنا
لأجل قلت الكلمة حرة
يدبحونا كل لحظة الف مرة
وللمناضل اولوية
حتى عند الدبح لا كبر
ولا سمى عليا
يا شعب فرط ف القضية
مأمأ ... و هوهو
مصر غابت عنها
شمس الإنسانية
-------------------------------
2- كتوبة
كتوبة يا امه مكتوبة
عرفت اقراها بصعوبة
عشان ع الحيطة مشطوبة
كتوبة من شباب ثوري
بيكتبها و قوام يجري
دة لو شافه العسس يا امه
خدوه ع السجن من بدري
كتوبة ساعة الفجر يكتبها
و بعد الضهر عسكرهم بتشطبها
و نص اليوم بنقراها
و نفهم يا امه معناها
تعبر عن مأسينا
و نار جوانا تكوينا
و صدري
كأنة كانون ملان ولعة
يبيعوا كل يوم مصنع
و يطفوا كل يوم شمعة
و منهج علم للتطبيع
من الإلزامي للجامعة
وكله ع الحيطان مكتوب
و باين مهما كان مشطوب
----------------
3- رد العمدة على البلاغ
نحن عمدة شرم الجونة
بالدوار يوم ستة بئونة
عرض علينا بلاغ حسونة
بعد الفحص اللازم منه
و الذي منة و اللي جابونا
رحنا سألنا المصنع كله
صاحب المصنع من لشبونة
رد مترجم صاحب المصنع
عفوا عمدة دي مختونة
و مدام ما بتملكش المونة
تفضل عمرك جرن و شونة
مرسوم وارد من امريكا
عيني يا ليلي علي اللي باعونا
جا لنا ترنك الباب العالي
يعزل عمدة شرم الجونة
رأي الدولة و دار الإفتا
رأي الغرب و ذل معونة
لازم كله يخاف على دينه
دين الدوله و دين المفتي
ودين امك يا شيخ حسونة
منقول
الإثنين 16 مارس 2009, 4:10 am